La referënta ê la doturia Monika Völkl che laora tl Sorvisc dles cures paliatives dl ospedal da Porsenú. Sciöche ëra nes á cunté n’ ara nia tres laoré te chësc repart, mo ëra ê pordërt doturia anestesista y doturia d’emergënza olache al nen vá da fá döt por mantigní la vita dles porsones.

Tl mëter man de so referat nes á la doturia Völkl splighé sciöche an pó odëi la vita: sciöche na spazirada te n bel de d’isté. Canche an pëia ia él n beliscimo tëmp y fora de nia se inscurëia döt y al dá jö le tonn. Ense prepará? No! Insciö él ince tla vita. Fora de nia sunse cunfruntá cun situaziuns che ne se aspetân nia y al basta püch por fá fora de na porsona sana n pazient che n’é nia plö bun da dí y fá ci che al éss gion.

Na poscibilié é se fá bel denant pinsiers y fá la desposiziun de tratamënt olache vignun á la facolté da stabilí y planifiché damperfora süa orenté, olache an pó formulé por familiars y por doturs indicaziuns sura le tratamënt canche an é te na te situaziun. Al nen vá da se dé jö cun le tema dla mort, a chëra che degügn ne ti sciampa, cun tëmes y dejiers. Al nen vá da se dé jö cun domandes sciöche: “Ci é pa por me important ala fin de mia vita?”, “Che dess pa tó por me dezijiuns?”, “Co y olá morissi pa iö gion?” y “Can á pa por me la vita ciamó n sëns?”. Chëstes reflesciuns ne mëssun nia fá da susc, mo damí le fá cun le dotur de ciasa o cun na porsona de fidënza, por che mi dejiders vëgnes respetá. Insciö él ince por doturs plü saurí tó les dërtes dezijiuns sce an röia te na situaziun olache la domanda é chëra de prolungé la vita, ince a düc i cosć, o lascé fá la vita so decurs.

Do le referat á la doturia Völkl respognü a domandes fates dai tröc antergnüs.

La desposiziun de tratamënt pó gní dada jö te comun olache ara vëgn registrada o ince a na porsona de fidënza che an s’á chirí fora.

Giulan ala doturia Völkl y ala Portina por l’ Assistënza y Cura por avëi dé impulsc de reflesciun sura la mort sciöche pert de nosta vita.